Femër e dashur, mësohu t’ia dalësh vetë! Mësohu me idenë që çfarëdolloj gjëje që të bësh, për një pjesë gjithmonë do jetë e gabuar, pikërisht sepse je femër.
Anxhela Peza
Psikologe Klinike
dhe Këshillimi
E nëse je edhe e bukur, akoma më keq.
Nëse vishesh keq, do thonë: S’di.
Nëse vishesh bukur, do thonë: Do që të dukesh?
Nëse nuk arrin diçka do të të thonë, e paaftë, dhe akoma më keq, nëse arrin diçka do thonë: Kush e di ç’ka bërë që arriti aty?!
Je gjithsesi e dënuar nga fjalët e njerëzve. Do të flasin për ty të gjitha femrat që të kanë zili, e në thelb duan të jenë si ty, por nuk e arrijnë dot.
Do flasin për ty dhe ato pseudo meshkuj që nuk kanë shansin më të vogël me ty dhe e dinë, ndaj e vetmja gjë që ju mbetet është përsëri të flasin.
Dhe më të ndyrët janë ata të cilët të qeshin në sy e bëjnë sikur të duan, e mezi presin të vjellin vrer prapa shpine.
Mos u mërzit! Janë pikërisht aty ku duhet të jenë. Mbrapa teje.
Jeta është shumë e shkurtër dhe shumë e bukur për të menduar për të tjerët.
Puno për veten, vishu për veten, mendo për veten, jeto për veten!
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
