Të mësuarit nuk përfundon me shkollën apo universitetin. Edhe në moshë madhore, përvetësimi i një gjuhe të re, mësimi i një instrumenti muzikor apo zhvillimi i një aftësie të re mund të sjellë përfitime për funksionet njohëse dhe mirëqenien psikologjike.
Një nga përfitimet kryesore lidhet me stimulimin e trurit. Përvetësimi i njohurive të reja aktivizon procese që lidhen me kujtesën, vëmendjen, arsyetimin dhe zgjidhjen e problemeve. Për këtë arsye, aktivitetet që kërkojnë përqendrim dhe praktikë mund të ndihmojnë në ruajtjen e shkathtësisë mendore edhe me kalimin e moshës. Të mësuarit mund të ndikojë edhe në motivim dhe mirëqenie emocionale. Kur një person zgjedh të studiojë diçka për shkak të interesit dhe kuriozitetit personal, procesi mund të jetë më i kënaqshëm dhe të shoqërohet me një ndjenjë më të madhe përmbushjeje. Studime të publikuara në literaturën akademike kanë lidhur motivimin autonom me nivele më të ulëta të stresit, mirëqenie më të madhe psikologjike dhe kënaqësi më të lartë me jetën.
Një tjetër aspekt i rëndësishëm është ndjenja e arritjes. Për një të rritur që përballet me punën dhe përgjegjësi të tjera të përditshme, përparimi në një aftësi të re mund të krijojë një ndjenjë konkrete zhvillimi personal. Arritje të vogla, si përfundimi i një kursi, kuptimi i një teme të vështirë apo zotërimi i një aftësie të re, mund të ndihmojnë në forcimin e vetëbesimit. Të mësuarit gjatë moshës së tretë lidhet gjithashtu me mirëqenien dhe pavarësinë. Një rishikim sistematik i botuar në Gerontology and Geriatric Medicine, që shqyrtoi programe edukative për të moshuarit, raportoi përfitime në mirëqenien e përgjithshme dhe funksionimin mendor, si dhe në ndjenjën e pavarësisë dhe lidhjes me të tjerët.
Në veçanti, mësimi i një gjuhe të huaj mund të krijojë edhe mundësi të reja për komunikim dhe ndërveprim shoqëror. Një studim i publikuar në Journal of the European Second Language Association ka raportuar përmirësime te të rriturit më të moshuar në vetëbesimin gjatë komunikimit, aftësitë sociale, pavarësinë dhe mirëqenien e përgjithshme pas përfshirjes në mësimin e një gjuhe të huaj. Në këtë kuptim, studimi në moshë madhore nuk është vetëm një mënyrë për të fituar njohuri të reja. Ai mund të jetë një aktivitet që stimulon mendjen, forcon ndjenjën e arritjes dhe krijon mundësi për zhvillim personal e social në etapa të ndryshme të jetës.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
