Në ambientet e Tirana Interacional, u zhvillua prezantimi i Librit “Tirana-Mahnia” i gazetares Rezarta Delisula. Të pranishëm në këtë event ishin përfaqësues të pushtetit lokal, drejtues mediash, koleg e kolege të gazetares, miq dhe të afërm të saj.
Delisula vjen me botimin e saj të parë, por kësaj radhe jo si gazetare, por si studiuese e veshur modestisht me “titullin tironse e vjetër”, ku e fton lexuesin të shohë kryeqytetin me sytë e saj për të shfletuar “Tirana-Mahnia”.
Gazetarja rreket të shpjegoje pyetje se:
Si ka qenë Tirana ne vite? Si është transformuar sot? Si kanë qenë sheshet (me foto) që janë shndërruar disa herë në këto dekada?
Cilët janë personazhet që i kanë dhënë shumë Tiranës? Si mund ta prezantojmë kryeqytetin tonë jo vetëm për brezat e rinj (qofshin vendas apo komunitet që i është bashkuar së fundi ritmit, jetës kryeqytetase) por edhe për të huajt? Sepse libri i gazetares vjen në dy gjuhë shqip dhe anglisht.
Delisula në fjalën përshëndetëse të saj për të ftuarit tha se ndihej shumë e emocionuar, sot për botimin e saj të parë “Tirana-Mahnia”.
Ajo shprehu një falënderim të veçantë për mbështetjen që bashkia e Tiranës i ka dhënë gazetares për realizimin e këtij libri, si edhe familjes së saj, kryesisht fëmijëve, të cilëve ajo i ka munguar për shkak të realizimit të këtij botimi.
Nënkryetari i bashkisë së Tiranës, Andi Seferi i pranishëm në këtë event, e inkurajoi Delisulën për punën e shkëlqyer që ka bërë, si dhe i akordoi asaj Certifikatë Mirënjohje ”Qytetare Nderi e Tiranës”.
Rezarta Delisula është gazetare profesioniste dhe që prej vitit 2007 është zëvendëskryeredaktore e “Gazetës Shqiptare”. Ajo ka punuar pranë së përditshmes “Panorama” dhe revistës “XXL”.
Studimet e larta i kreu në Fakultetin Histori-Filologji, dega Gazetari dhe ky libër është pjesë e punës së saj 20-vjeçare, me mbi 500 artikuj kushtuar Tiranës, qytetit ku ka lindur dhe jeton.
© Nuk lejohet riprodhimi i shkrimeve pa vendosur autorësinë e revistës "Psikologjia" dhe pa cituar burimin.
